فرحت بخش خوشبو

ہم نے دیکھا کہ بائبل کی توجہ خود نوح پر نہیں بلکہ قربانیوں پر مرکوز ہے۔ ہم نے دیکھا کہ کس طرح کچھ عظیم اور خدا ترس مفسرین نے غلطی سے اپنی توجہ نوح کی خدا ترسی اور اس کی دعاؤں کی طرف مبذول کر لی۔ قربانی پر تبصرہ کرنے کے بجائے، انہوں نے اپنی توجہ نوح، اس کی پارسائی اور دعاؤں پر مرکوز کر دی۔

میرے خیال میں یہ ہمارے دور کا ایک حقیقی مسئلہ ہے، اور ایسا لگتا ہے کہ یہ صورتحال مزید بگڑتی جا رہی ہے۔ آج کل مسیحیت کا مرکز زیادہ تر انسان کے ’’احساسات‘‘ اور ’’اعمال‘‘ بنتے جا رہے ہیں، جبکہ مسیح کی اس معروضی اور خارجی قربانی پر توجہ کم ہوتی جا رہی ہے؛ اور یوں انہوں نے...

”خالق کی بجائے مخلوق کی عبادت اور خدمت کی“ (رومیوں 1:25)۔

مسیحیت کا مرکز محض راستباز ہونے کا احساس نہیں بلکہ راستباز ٹھہرایا جانا ہے۔ یسوع کے پاس آنے کے لیے اس حد تک احساسِ جرم ہونا ضروری ہے جو ہمیں اس کی طرف لے جائے، لیکن میرا نہیں ماننا کہ ایمان لانے والے شخص کو ہر وقت اور ہمیشہ خود کو راستباز محسوس کرتے رہنا چاہیے۔ ایمان میں کبھی کبھار اتار چڑھاؤ آ سکتا ہے اور اس کی لو مدھم پڑ سکتی ہے۔ مگر رسول ہمیں یہ نہیں کہتا کہ ہم ایمان کے ذریعے سے نجات پاتے ہیں۔ وہ کہتا ہے کہ ہم ’’ایمان کے وسیلے سے ہی نجات پاتے ہیں‘‘ (افسیوں 8: 2)۔ نجات دینے والی چیز خود ایمان نہیں ہے، بلکہ مسیح ہے جو ہمیں نجات بخشتا ہے۔ جب ہم مسیح میں ”ایمان کے وسیلے سے نجات“ پا لیتے ہیں، تو بعد میں کبھی کبھار ہمیں یہ محسوس ہو سکتا ہے کہ ہمارا ایمان کافی نہیں ہے، اور یہ بات درست بھی ہو سکتی ہے۔ لیکن ہماری نجات ایمان کی وجہ سے نہیں، بلکہ ایمان کے وسیلے سے ہوتی ہے۔ اور اگرچہ ہماری آدمیتی فطرت (یعنی وہ انسانی فطرت جو ایمان لانے کے بعد بھی باقی رہتی ہے) کی وجہ سے ہمارا ایمان کبھی کبھار مدھم پڑ سکتا ہے، پھر بھی ہم راستباز ہی ٹھہرائے رہتے ہیں کیونکہ ہم...

”خدا کی قدرت سے محفوظ رکھے جاتے ہیں“ (I پطرس 1: 5)۔

یاد رکھیں کہ شاگردوں نے یسوع سے پوچھا تھا،

’’پھر کون نجات پا سکتا ہے؟ اور یسوع نے اُن کی طرف دیکھ کر کہا، یہ انسانوں کے لیے تو ناممکن ہے لیکن خدا کے لیے نہیں، کیونکہ خدا سے سب کچھ ہو سکتا ہے‘‘ (مرقس 10: 26۔27)۔

خدا نجات دلانے والے ایمان کو ممکن بناتا ہے۔ اور، اس طرح، جب ایک آدمی یسوع میں ایمان کے ذریعے نجات پاتا ہے، تو اس کے پاس ’’ہمیشہ کی زندگی ہوتی ہے، اور وہ سزا کا مستحق نہیں قرار پائے گا، بلکہ موت سے زندگی میں منتقل ہو جاتا ہے‘‘ (یوحنا 5: 24) – چاہے وہ ہمیشہ محسوس کرتا ہے کہ وہ موت سے زندگی میں چلا گیا ہے یا نہیں، کیونکہ،

’’یہ باپ کی مرضی ہے جس نے مجھے بھیجا ہے کہ میں اُن میں سے کسی کو ہاتھ سے نہ جانے دوں جِنہیں اُس نے مجھے دیا ہے بلکہ آخری دِن پھر سے زندہ کر دوں‘‘ (یوحںا 6: 39)۔

یہ سچ ہے کیونکہ یسوع نے تمام سچے مذہب بدلنے والوں کے بارے میں کہا،

’’میں اُنہیں ہمیشہ کی زندگی دیتا ہوں اور وہ کبھی ہلاک نہ ہوں گے‘‘ (یوحنا 10: 28)۔

تو پھر وہ لوگ جو یسوع کے پاس آتے ہیں،

”خدا کی قدرت سے محفوظ“ ہوتے ہیں۔ (I پطرس 1: 5)۔

یہ سب کچھ ظاہر کرتا ہے کہ ہماری نجات ایمان لانے کے بعد (یا اس سے پہلے) کے ہمارے موجودہ احساسات کے وسیلے سے نہیں، بلکہ اُس ایمان کے تحفے کے ذریعے ہوتی ہے جو ہمیں اُس وقت عطا کیا جاتا ہے جب ہم مسیح یسوع میں راستباز ٹھہرائے جاتے ہیں۔ چنانچہ، جب خدا کسی شخص کو یسوع پر نجات بخشنے والا ایمان عطا کرتا ہے، تو وہ اسے واپس نہیں لیتا۔ اور تب سے ایمان لایا ہوا بندہ یسوع پر اور صلیب پر اُس کی قربانی پر بھروسہ رکھتا ہے۔ ایمان لانے کے بعد اُس کا ایمان گھٹ بڑھ سکتا ہے، لیکن اُس کی نجات مسیح یسوع میں محفوظ رہے گی۔ اور یہ بات ہمیں نوح کی قربانی سے متعلق ہماری اصل تلاوت کی طرف واپس لے جاتی ہے:

’’اور جب وہ فرحت بخش خوشبو خداوند تک پہنچی تو خداوند نے دِل ہی دِل میں کہا، میں انسان کے سبب سے پھر کبھی زمین پر لعنت نہیں بھیجوں گا …‘‘ (پیدائش 8: 21)۔

اس تلاوت کا مرکزِ نگاہ نوح کا مسلسل اور کامل ایمان یا اطاعت نہیں، بلکہ مسیح ہے جس کی عکاسی نوح کی قربانیوں میں کی گئی ہے۔ چنانچہ، ہماری تلاوت کا مرکزی نکتہ یہ ہے کہ ان قربانیوں نے خدا پر کیا اثر ڈالا۔

ہم اس تلاوت میں دو بنیادی خیالات دیکھ سکتے ہیں: (1) یہ قربانیاں مسیح کی قربانی کی طرف اشارہ کرتی تھیں؛ اور (2) اس طرح ان قربانیوں نے خدا کے غضب کو تشفی بخشی۔

I۔ پہلی بات، نوح کی قربانیاں مسیح کی قربانی کی جانب نشاندہی کرتی ہیں۔

’’اور خداوند تک وہ فرحت بخش خوشبو پہنچی …‘‘ (پیدائش 8: 21)۔

جنیوا بائبلThe Geneva Bible میں، 1599 کا پرانا ترجمہ، الفاظ ’’وہ فرحت بخش خوشبو‘‘ کو ’’آرام کی فرحت‘‘ کے طور پر پیش کرتا ہے۔ اس کا ترجمہ ’’آرام کی خوشبو‘‘ کے طور پر بھی کیا جا سکتا ہے۔ جنیوا بائبل میں تبصرہ کہتا ہے، ’’اس طرح اس نے اپنے آپ کو مطمئن اور اپنے غصے کا آرام ظاہر کیا‘‘ (1599 کی جنیوا بائبل The 1599 Geneva Bible، ٹولے لیج پریس Tolle Lege Press، 2006 دوبارہ اشاعت، پیدائش 8: 21 پر غور طلب بات)۔ مارٹن لوتھر نے کہا،

عبرانی اصطلاح کا مطلب ہے ’’آرام کی خوشبو‘‘۔ اس کا مفہوم یہ ہے کہ خدا کے غضب کی تشفی ہوئی اور صلح کا ماحول قائم ہوا۔ کوئی یہ سوال کر سکتا ہے کہ موسیٰ نے محض یہ کیوں کہا کہ خدا نے آرام کی خوشبو محسوس کی، اور یہ کیوں نہیں کہا کہ اس نے نوح اور اس کی قربانی کو قبول فرمایا؟ میرے نزدیک، گفتگو کا یہ انداز اس بات کی نشاندہی کرتا ہے کہ خدا اس قدر قریب تھا کہ وہ... قربانی کی مہک محسوس کر سکتا تھا۔ اس سے موسیٰ کا مقصد یہ ظاہر کرنا ہے کہ وہ (قربانی) اُسے بہت پسند آئی... موسیٰ نے گفتگو کا یہ اسلوب اس لیے اختیار کیا تاکہ ہم... خدا کے فضل کو سمجھ سکیں (مارٹن لوتھر، Th.D.، لوتھر کا پیدائش کی کتاب پر تبصرہ Luther’s Commentary of Genesis، ژونڈروان پبلشنگ ہاؤس، 1958 کی اشاعتِ نو، جلد اول، صفحہ 157)۔

’’اور خداوند تک وہ فرحت بخش خوشبو پہنچی …‘‘ (پیدائش 8: 21)۔

میتھیو ھنری نے ایس نکتے کو واضح کیا جب اُس نے کہا،

اس میں اُس [خدا] کی نظر نوح کی [اُس] قربانی پر اتنی نہیں تھی جتنی مسیح کی اپنی اُس قربانی پر تھی، جس کی علامت اور عکاسی نوح کی قربانی کے ذریعے کی گئی تھی (میتھیو ھنری کا تمام بائبل پر تبصرہ Matthew Henry’s Commentary on the Whole Bible، ہینڈریکسن پبلیشرز، 1996 کی دوبارہ اشاعت، جلد اول، صفحہ 55)۔

اس تشبیہ کی تکمیل مسیح کی صلیبی قربانی ہے، جس کا ذکر نئے عہد نامے میں افسیوں 5: 2 میں ملتا ہے؛ جیسا کہ میتھیو ھنری نے اپنے تبصرے میں کچھ آگے چل کر اس کی نشاندہی کی ہے۔

’’مسیح نے بھی ہم سے محبت کی اور اپنے آپ کو ہمارے لیے خوشبو کی طرح خدا کی نذر کر کے قربان کیا‘‘ (افسیوں 5: 2)۔

مجھے ایک بار پھر یہ کہنا چاہیے کہ نوح کی قربانی نے صلیب پر مسیح کی قربانی کی طرف اشارہ کیا تھا۔ آج ’خداوند کے عشائے ربانی‘ کا اشارہ ماضی میں صلیب پر دی گئی مسیح کی قربانی کی طرف ہے۔ عہدِ عتیق کی قربانیوں نے مسیح کی طرف اشارہ کیا تھا؛ اور خداوند کا عشائے ربانی مسیح کی طرف (ماضی کے حوالے سے) اشارہ کرتا ہے۔

’’یہ بات مجھ تک خداوند کے ذریعے پہنچی اور میں نے تم تک پہنچا دی کہ خداوند یسوع نے جس رات وہ پکڑوایا گیا روٹی لی اور خدا کا شکر ادا کر کے توڑی اور کہا، یہ میرا بدن ہے جو تمہارے لیے ہے، میری یادگاری کے لیے یہی کیا کرو۔ اُسی طرح اُس نے کھانے کے بعد پیالہ بھی لیا اور کہا، یہ پیالہ میرے خون میں نیا عہد ہے۔ جب بھی اِسے پیو میری یادگاری کے لیے پیا کرو۔ کیونکہ جب کبھی تم یہ روٹی کھاتے اور اِس پیالہ میں سے پیتے ہو تو خداوند یسوع کی موت کا اِظہار کرتے ہو جب تک کہ وہ پھر نہ آ جائے‘‘ (I کرنتھیوں 11: 23۔26)۔

جب ہم خداوند کے عشائیہ میں شامل ہوتے ہیں تو ہم روٹی کھاتے ہیں اور ایسا اُس کی ”یادگاری“ میں کیا جاتا ہے تاکہ ہمیں یاد دلایا جا سکے کہ مسیح کا بدن ہمارے گناہوں کا کفارہ ادا کرنے کے لیے صلیب پر کیلوں سے ٹھونکا گیا تھا۔ پھر ہم پیالہ لیتے ہیں، جیسا کہ مسیح نے کہا تھا، ”میری یادگاری میں۔“ یہ پیالہ ہمیں مسیح کے اُس لہو کی یاد دلاتا ہے جو ہمیں ہمارے گناہوں سے پاک کرنے کے لیے صلیب پر بہایا گیا تھا۔

’’اور جب وہ کھانا کھا رہے تھے تو یسوع نے روٹی لی اور برکت کے کر اُس کے ٹکڑے کیے اور شاگردوں کو دے کر کہا، لو اور کھاؤ۔ یہ میرا بدن ہے۔ پھر اُس نے پیالہ لیا اور خدا کا شکر ادا کیا اور اُنہیں دے کر کہا، تم سب اِس میں سے پیو کیونکہ یہ نئے عہد کا میرا وہ خون ہے جو بہتیروں کے گناہوں کی معافی کے لیے بہایا جاتا ہے‘‘ (متی 26: 26۔28)۔

ہم صلیب پر مسیح کی قربانی کی ’’یادگاری‘‘ کے طور پر روٹی اور پیالہ لیتے ہیں۔ ایسا اس لیے کیا جاتا ہے کیونکہ ہمیں صلیب پر مسیح کی قربانی کی مسلسل یاد دہانی کی ضرورت رہتی ہے۔ اسی لیے ہم خداوند کا عشائیہ [عشائے ربانی] مسیح کی ’’یادگاری‘‘ میں مناتے ہیں۔

اس دور کے نظام میں، عشائے ربانی پیچھے ماضی کی طرف، یعنی صلیب پر مسیح کی قربانی کی جانب اشارہ کرتا ہے۔ لیکن عہدِ عتیق کی قربانیاں، جن میں نوح کی قربانیاں بھی شامل ہیں، مستقبل کی طرف اشارہ کرتی تھیں، یعنی مسیح کے اس دکھ اور موت کی طرف جو اُس نے انسان کے گناہ کی سزا چکانے کے لیے برداشت کی۔ اسی لیے

’’خداوند تک وہ فرحت بخش خوشبو پہنچی …‘‘ (پیدائش 8: 21)۔

اس کی وجہ یہ تھی کہ خدا نے نوح کی قربانی میں اپنے اکلوتے بیٹے کی آنے والی قربانی کو دیکھا۔

’’مسیح نے بھی ہم سے محبت کی اور اپنے آپ کو ہمارے لیے خوشبو کی طرح خدا کی نذر کر کے قربان کیا‘‘ (افسیوں 5: 2)۔

یہ ہماری رہنمائی دوسرے نکتے کی جانب کرتی ہے۔

II۔ دوسری بات، پس، نوح کی قربانی خداوند کے قہر کی تشفی کرتی ہے۔

’’خداوند تک وہ فرحت بخش خوشبو پہنچی …‘‘ (پیدائش 8: 21)۔

1599 کے جنیوا بائبل نے اس تلاوت کا ترجمہ یوں کرتے ہوئے اس خیال کو اجاگر کیا: ”خداوند نے آرام کی خوشبو محسوس کی۔“ جنیوا بائبل کی حاشیے میں غور طلب بات کہتی ہے: ”اس کے ذریعے وہ [خدا] ظاہر کرتا ہے کہ وہ راضی ہو گیا ہے اور اس کے غضب کی تشفی ہو گئی ہے“ 1599 کی جنیوا بائبل The 1599 Geneva Bible، ٹولے لیج پریس Tolle Lege Press، 2006 دوبارہ اشاعت، پیدائش 8: 21 پر غور طلب بات)۔ ڈاکٹر رائیری (Dr. Ryrie) نے کہا کہ اس آیت کا لفظی مطلب ہے ”اطمینان کی مہک“ (چارلس سی رائیری پی ایچ۔ ڈی۔، Charles C. Ryrie, Ph.D.، رائیری کا مطالعہ بائبل The Ryrie Study Bible، موڈی پریس، 1978، پیدائش 8: 21 پر غور حاشیے کی غور طلب بات)۔ خداوند نے سکون اور اطمینان کی مہک محسوس کی۔

اس کا مطلب یہ ہے کہ خدا نے نوح کی قربانیوں میں اپنے بیٹے، خداوند یسوع مسیح کی آنے والی قربانی کو دیکھا اور وہ مطمئن ہوا؛ اس کا غضب تھم گیا اور اس کے قہر کی تشفی ہو گئی۔ I یوحنا 4: 10 کہتی ہے:

”محبت یہ نہیں کہ ہم نے اُس سے محبت کی بلکہ یہ ہے کہ اُس نے ہم سے محبت کی اور اپنے بیٹے کو ہمارے گناہوں کا کفارہ بننے کے لیے بھیجا۔“ (I یوحنا 4: 10)

دوبارہ I یوحنا کہتا ہے،

’’وہ ہمارے گناہوں کا کفارہ ہے‘‘ (I یوحنا 2: 2)۔

”یسوع نے گناہ کے خلاف خدا کے عدالتی فیصلے اور قہر کو اپنی ذات پر قبول کر لیا اور اپنی موت کے ذریعے اُس فیصلے کو مکمل طور پر اپنے اوپر لے لیا“ (اصلاحی مطالعہ بائبل کی روح Spirit of the Reformation Study Bible، ژونڈروان اشاعت گھر Zondervan Publishing House، 2003، I یوحنا 2: 2 کے حاشیے میں غور طلب بات)۔ پہلا یوحنا 4: 10 کے حوالے سے ڈاکٹر گل نے کہا،

یہ ضروری ہے کہ [انسان کے] گناہوں کا کفارہ ادا کیا جائے یا ان کی تلافی کی جائے جس سے مراد مسیح کا ان کے لیے کفارہ بننا ہے تاکہ خدا کے عدل کا تقاضا پورا ہو... اور خدا کا وہ غضب جس کا متسحق گناہ ہوتا ہے، ٹل جائے یا اُس کی تشفی ہو جائے (جان گل، ڈی ڈی John Gill, D.D.، نئے عہدنامے کی ایک تفسیر An Exposition of the New Testament، دی بیپٹسٹ اسٹینڈرڈ بیئرر The Baptist Standard Bearer، 1989 کی دوبارہ اشاعت، جلد سوم، صفحہ 647)۔

یہی وجہ ہے کہ خُدا نے ’’فرحت بخش خوشبو سونگھی‘‘، ’’آرام کی خوشبو‘‘ اور ’’اطمینان کی مہک‘‘ (پیدائش 8: 21)۔ یہ اس لیے تھا کہ اس نے نوح کی سوختنی قربانیوں میں یسوع کی ایک تصویر، ایک تشبیہ، اپنے انصاف کو پورا کرنے اور گناہ کے خلاف اپنے غضب کو کم کرنے کے لیے صلیب پر مرتے ہوئے دیکھی تھی۔ اس کے غضب کی ’’تسلی‘‘ ہوئی جب اس نے نوح کی قربانیوں کی خوشبو سونگھی – کیونکہ اُس نے صلیب پر مسیح کے کفارے کی تصویر کشی کی۔ جوزف ہارٹ نے اس بات کو بہت واضح کیا جب اس نے لکھا،

گناہ کی تاریک کوٹھری میں جب ہم پڑے تھے،
تو رحمت نے پکارا ”معاف کر دو“ اور عدل نے کہا ”رک جاؤ“۔
مگر یسوع نے جواب دیا: ”انہیں آزاد کر دو!
انہیں معاف کر دو اور مجھے سزا دو۔“
   (شاعر جوزف ہارٹ Joseph Hart کی نظم ”وہ خوشخبری The Gospel“، 1712-1768)۔

اس بات کو آپ پر واضح کرنے کے لیے مجھے اس سے بہتر کوئی طریقہ نہیں سوجھتا کہ سپرجیئن کے یہ الفاظ پڑھ کر سناؤں:

     جب میں اپنے گناہوں کی سزایابی کے تلے دبا ہوا تھا، تو مجھے خدا کے عدل کا گہرا اور شدید احساس تھا۔ گناہ، خواہ دوسروں کے نزدیک کچھ بھی ہو، میرے لیے ایک ناقابلِ برداشت بوجھ بن گیا تھا... میں خود کو اس قدر شدید گناہ گار سمجھتا تھا کہ مجھے یاد ہے کہ میں یہ محسوس کرتا تھا کہ اگر خدا مجھے گناہ کی سزا نہ دے، تو اسے ایسا ضرور کرنا چاہیے... مجھے یہ احساس تھا کہ... جو گناہ میں نے کیا ہے، اس کی سزا ملنی ہی چاہیے...
     میں نے یسوع کی قربانی کے ذریعے نجات کے منصوبے کے بارے میں سن رکھا تھا، لیکن... یہ بات مجھ پر ایک نئے انکشاف کی طرح ظاہر ہوئی کہ یسوع کو ہی ’’ہمارے گناہوں کا کفارہ‘‘ قرار دیا گیا ہے (I یوحنا 2: 2)...
     یسوع ہماری خاطر موت کی سزا اٹھا چکا ہے! ذرا اس حیرت انگیز منظر کو تو دیکھیں! وہ وہاں صلیب پر لٹکا ہوا ہے! یہ وہ سب سے بڑا نظارہ ہے جسے آپ کبھی دیکھ پائیں گے... وہ وہاں لٹکا ہوا، ناقابلِ بیان اذیت سہہ رہا ہے – ایک راستباز، ناراستوں کی خاطر – تاکہ وہ ہمیں خدا تک پہنچا سکے۔ آہ، اس منظر کا کیا ہی جلال ہے! وہ بے گناہ جو دکھ اٹھا رہا ہے! وہ قدوس جسے مجرم ٹھہرایا گیا! وہ ابدی بابرکت ہستی جسے لعنت ٹھہرایا گیا! وہ لامحدود جلالی ہستی جسے شرمناک موت دی گئی! جتنا زیادہ میں خدا کے بیٹے کے دکھوں پر غور کرتا ہوں، اتنا ہی مجھے یقین ہوتا جاتا ہے کہ یہ دکھ میرے معاملے کا حل ہیں... یسوع کی محبت بھری قربانی ہمارے گناہوں کے تمام کے تمام پہاڑوں کو اپنے اندر سمو کر ختم کر سکتی ہے... خدا گناہ گار کو نجات دے گا کیونکہ اس نے اپنے ہی بیٹے کا بھی دریغ نہ کیا۔ خدا آپ کی خطاؤں کو درگزر کر سکتا ہے کیونکہ اس نے وہ تمام خطائیں اپنے اکلوتے بیٹے پر ڈال دی تھیں...
     اگر آپ اُس پر ایمان رکھتے ہیں، تو میں آپ سے کہتا ہوں کہ آپ جہنم میں نہیں جا سکتے، کیونکہ ایسا ہونے سے اُس کی کامل قربانی بے اثر ہو جائے گی۔ اگر خداوند یسوع مسیح میری جگہ پر مرا، تو مجھے بھی کیوں مرنا چاہیے؟... کاش کہ آپ کو وہ فضل ملے... کہ آپ اپنی نظریں یسوع پر جمائیں، جو گناہ گار انسان کے لیے رحمت کا سرچشمہ ہے!... آئیے... ہم اپنی جانیں ہمیشہ کے لیے اُس کے سپرد کر دیں جس نے گناہ گاروں کی خاطر اپنا خون بہایا۔ ہم اُسی نجات دہندہ … کے وسیلے سے نجات پائیں گے۔ اگر اُس پر بھروسا کرتے ہوئے آپ ہلاک ہوتے ہیں، تو مجھے بھی ہلاک ہونا پڑے گا۔ اُس خوشخبری پر اپنے اعتماد کو ثابت کرنے کے لیے میں اور کیا کر سکتا ہوں جو آپ کے سامنے پیش کی گئی ہے؟ (سی۔ ایچ۔ سپرجیئن C. H. Spurgeon، ’’ایک عادل خدا‘‘ A Just God، چیپل لائبریری Chapel Library، پینساکولا Pensacola، فلوریڈا Florida)۔

یہ ہمارے زیرِ بحث تلاوت کا ایک عمدہ اطلاق ہے۔ ایمان لانے کے اپنے تجربے کے دوران، سپرجیئن پر یہ حقیقت آشکار ہوئی کہ خدا کا انصاف یسوع پر گِرنا چاہیے، جو ’’ہمارے گناہوں کا کفارہ‘‘ ہے (I یوحنا 2: 2)۔ اس کے وقوع پذیر ہونے کے لیے، آپ کو یسوع کی طرف رجوع کرنا ہوگا، اُن کے پاس آنا ہوگا اور اُس پر بھروسہ کرنا ہوگا۔ جب ایسا ہوگا، تو خدا کے غضب کی تشفی ہو جائے گی اور آپ کے گناہ اُس کے خون سے دھل کر پاک ہو جائیں گے۔

آؤ اے گناہ گارو، جو بھٹکے ہوئے اور ناامید ہو،
   یسوع کا لہو تمہیں رہائی دلا سکتا ہے؛
کیونکہ اُس نے تم میں سے بدترین لوگوں کو بھی بچایا،
   جب اُس نے مجھ جیسے بدحال گناہ گار کو نجات دی۔
اور میں جانتی ہوں، ہاں، میں جانتی ہوں،
   کہ یسوع کا لہو بدترین گناہ گار کو بھی پاک کر سکتا ہے۔
اور میں جانتی ہوں، ہاں، میں جانتی ہوں،
   کہ یسوع کا لہو بدترین گناہ گار کو بھی پاک کر سکتا ہے۔
(ہاں میں جانتی ہوں!Yes, I Know!“ شاعرہ اینا ڈبلیو واٹر مین Anna W. Waterman، 1920)۔

(واعظ کا اختتام)
آپ انٹر نیٹ پر ہر ہفتے ڈاکٹر ہائیمرز کے واعظ www.sermonsfortheworld.com
یا پر پڑھ سکتے ہیں ۔ "مسودہ واعظ Sermon Manuscripts " پر کلک کیجیے۔

یہ مسوّدۂ واعظ حق اشاعت نہیں رکھتے ہیں۔ آپ اُنہیں ڈاکٹر ہائیمرز کی اجازت کے بغیر بھی استعمال کر سکتے
ہیں۔ تاہم، ڈاکٹر ہائیمرز کے ہمارے گرجہ گھر سے ویڈیو پر دوسرے تمام واعظ اور ویڈیو پیغامات حق
اشاعت رکھتے ہیں اور صرف اجازت لے کر ہی استعمال کیے جا سکتے ہیں۔